Në Samitin e Selanikut, në qershor 2003, BE-ja theksoi përkrahjen e saj paekuivok për perspektivën Evropiane të Ballkanit Perëndimor. Këshilli e përsëriti këtë angazhim më 10 dhjetor 2007 dhe rikonfirmoi përkrahjen e tij të vazhduar për rrugën e rajonit drejt BE-së. Si rezultat Kosova është e ankoruar vendosmërisht në kornizën e Procesit të Stabilizim Asociimit.
Objektivi i BE-së në Kosovë është të përkrahë dhe ndihmojë autoritetet vendore në zhvillimin e një Kosove stabile, të qëndrueshme, paqësore dhe shumetnike që bashkëpunon në mënyrë paqësore me fqinjët e saj në rajon dhe për këtë arsye Këshilli i Bashkimit Evropian emëroi Përfaqësuesin Special të BE-së (EUSR) në Kosovë.
Mandati: mandati është përcaktuar me Vendimin e Përbashkët të Këshillit 2010/446/CFSP të datës 11 Gusht 2010. Përfaqësuesi Special i BE-së për Kosovën:
· do të ofrojë këshillimin dhe përkrahjen e BE-së për Qeverinë e Kosovës në procesin politik drejt integrimit evropian.
· do të promovojë koordinimin e përgjithshëm të pranive të BE-së në Kosovë, si p.sh. Zyrën Ndërlidhëse të Komisionit Evropian dhe Misionin e Sundimit të Ligjit EULEX.
· do të sigurojë njëtrajtshmëri dhe koherencë në veprimet e BE-së që kanë për synim publikun.
· do të ofrojë këshillim politik lokal për Drejtuesin e Misionit të BE-së për Sundimin e Ligjit, EULEX në Kosovë.
· do të kontribuojë në zhvillimin dhe konsolidimin e respektit për të drejtat dhe liritë themelore të njeriut në Kosovë.
Përfaqësuesi Special i BE-së, Pieter Feith, i raporton Këshillit të Bashkimit Evropian, organit ndër-qeveritar që përfaqëson 27 vendet anëtare të BE-së, nëpërmjet Përfaqësueses së Lartë për Politikë të Përbashkët të Jashtme dhe Siguri (CFSP) dhe Zëvendës-Presidentes së Komisionit Evropian, Catherine Ashton, e cila u emërua në këtë post në Nëntor 2009.
Përfaqësuesi Special i BE-së, aktualisht ka mandat të dyfishtë dhe vepron gjithashtu si Përfaqësues Ndërkombëtar Civil (ICR) për Kosovën. Për më tepër informacion në lidhje me këtë mandate të veçantë, luteni të klikoni këtu.
